வெப்பம்-சார்ந்த நலிவுநிலைகள் மற்றும் தாக்கங்களை அடையாளம் காணுதல் பாடத்திட்டத்திற்கு வரவேற்கிறோம்! வெப்பம்- சார்ந்த நோய், காயம், அல்லது மரணத்திற்கு ஒரு நபர் அல்லது சமூகம் ஏன் அதிக அபாயத்தில் உள்ளது என்பதற்கு பல்வேறு வகையான காரணங்கள் உள்ளன. உதாரணமாக, குளிர்ச்சியான பகுதிகளுக்கான அணுகலைப் பெற முடியாதவர்கள் அல்லது தங்களது பொருளாதார நிலையின் காரணமாக ஏர் கண்டிஷனிங் வசதியைப் பயன்படுத்த முடியாதவர்கள் அதிக அபாயங்களை எதிர்கொள்ளக் கூடும்.

சமமான பலன்களைப் பெறுவதற்கான திட்டங்கள் மற்றும் முதலீடுகளுக்கு முன்னுரிமை அளித்து செயல்படுத்துவதற்கு, வெப்பம்-சார்ந்த தாக்கங்கள் ஏற்படும் அபாயத்தில் உள்ள உங்களது பகுதியில் உள்ள மக்கள் அனைவரையும் நீங்கள் அடையாளம் கண்டு இணைக்க வேண்டும். இது இந்த குழுக்களுடன் கூட்டாக இணையவும் உங்களது திட்டங்களில் சமூக மக்களால்-வழிநடத்தப்பட்ட அணுகுமுறையை மேற்கொள்வதற்கும் உங்களை அனுமதிக்கும். இந்த பாடத்திட்டத்தில், உங்களது சூழ்நிலையில் நலிவுநிலை என்பதை விவரிப்பீர்கள் மேலும் அதனைத் தொடர்ந்து நிலப்பரப்பு அல்லது அடிப்படை சமுதாய, பொருளாதார மற்றும் ஆரோக்கிய நிலைகளின் காரணமாக வெப்பத் தாக்கங்களுக்கு அதிக நலிவடையக்கூடிய சமூக மக்கள் குழுக்களை இனம் காணுவீர்கள்.

இந்த பாடத்திட்டம் இதற்கு முந்தைய பாடத்திட்டமான, ஒரு அடிப்படை வெப்ப அபாய மதிப்பீட்டை மேற்கொள்ளுதல்’ என்பதில் கிடைத்த வெளிப்பாடுகளை அடிப்படையாக கொண்டு உருவாக்கப்படலாம்.

வெப்பம்-சார்ந்த நோய் அல்லது மரணம் ஏற்படக்கூடிய அபாயம் அனைத்து மக்களுக்கும் உள்ளது, ஆனால் அந்த அபாயத்தின் அளவு வேறுபடுகிறது. பல சமுதாய, பொருளாதார, மற்றும் உடல் சார்ந்த காரணிகள் வெப்பம்- சார்ந்த நோய் அல்லது மரணம் ஏற்படக்கூடிய ஒரு நபர் அல்லது சமூகத்தின் அபாயத்தை பாதிக்கிறது. இவற்றில் உள்ளடங்குபவை வயது, மதம்/சமுதாயப் பிரிவு, சமூக மக்களிடையே ஒற்றுமை, கலாச்சார விதிமுறைகள், ஒதுக்குதல்/ஓரம்கட்டுதல், பாலினம், வருமானம் மற்றும் சொத்து, மொழி, தொழில், இனம், ஏற்கெனவே உள்ள நோய் நிலைகள், ஒருசில பரிந்துரைக்கப்பட்ட மருந்துகளைப் பயன்படுத்துதல், மற்றும் குளிர்ச்சியான இடங்கள் மற்றும் குடி தண்ணீருக்கான அணுகல்  ஆகியவை.

நலிவுநிலை மதிப்பீடுகள் பெரும்பாலும் ஒரு பகுதி முழுவதும் எப்படி வெப்பநிலை விநியோகிக்கப்பட்டுள்ளது (ஒரு அடிப்படை வெப்ப அபாய மதிப்பீட்டை மேற்கொள்ளுதல் பகுதியைப் பார்க்கவும்), வயது, வருமானம், மற்றும் குளிர்வித்தலுக்கான அணுகல் (குளிர்வித்தல் மையங்கள், மரங்களின் மேற்பரப்பு விதானம் போன்றவை) மற்றும் மின்னாற்றல் சுமை ஆகியவற்றை மதிப்பாய்வு செய்யும்.

விரிவான வெப்ப நலிவுநிலை வரைபடங்களைத் தயாரிப்பதற்கும் வெப்பம் எங்கே மோசமான தாக்கங்களை ஏற்படுத்தக்கூடும் என்பது குறித்த எதிர்கால முன்கணிப்புகளுக்காகவும் ஆராய்ச்சியாளர்கள் பெரும்பாலும் அரசாங்கங்களுடன் கூட்டாக பணியாற்றுவார்கள். வெப்பத்தில் அதிகமாக பாதிக்கப்பட்ட சமூகத்தினரை ஈடுபடுத்துவது (எ.கா. ஒரு கணக்கெடுப்பு அல்லது பங்கேற்பு மதிப்பீட்டு செயல்முறை மூலமாக) உங்களது மதிப்பாய்வு துல்லியமாகவும் மக்களின் வாழ்க்கை அனுபவங்களின் அடிப்படையில் உருவாவதையும் உறுதி செய்யும். ஒரு நலிவுநிலை மதிப்பீட்டைச் செய்ய ஆரம்பிக்கும்போது, சமூக மக்களை ஈடுபடுத்துவதற்கான ஒரு நடைமுறை செயல்திட்டத்தை உருவாக்க களப்பணி மற்றும் தகவல்தொடர்பைச் செய்வதற்கு உங்களிடம் உள்ள நேரம் மற்றும் வளங்களை கணக்கிடுங்கள்.

ஒவ்வொரு அதிகார எல்லைக்குட்பட்ட பகுதிகளும் வெப்பம்- சார்ந்த பிரத்யேகமான சவால்களை எதிர்கொள்கின்றன. அருகில் கடற்கரைகள் அல்லது மலைத்தொடர்கள் இருப்பது போன்ற நிலப்பரப்பு மற்றும் பருவநிலைக் காரணிகள் எப்படி உங்களது பகுதியை பாதிக்கிறது என்பதை யோசிக்கவும். மக்கள்தொகை மற்றும் பொருளாதார காரணிகளும் முக்கியமானவை ஆகும். உதாரணமாக, ஒரு நகரில் பல வெளியில் வேலை செய்யும் தொழிலாளர்கள் இருப்பார்கள்; மற்றொன்றில் ஒரு சுற்றுலாக் காலத்தை அடிப்படையாகக் கொண்டு இருக்கலாம், அதனால் வெளியில் இருந்து வரும் நபர்களைக் காப்பதற்கான திட்டங்களுக்கு அவசியத் தேவை உள்ளது; மற்றொன்றில் தற்போது அல்லது வரலாற்றுக் காலங்களில் இன ரீதியாக ஒடுக்கப்பட்டிருக்கலாம் மேலும் மற்ற வகையான ஒதுக்குதல்களையும் எதிர்கொண்டிருக்கலாம். ஒடுக்கப்படுதல் மற்றும் ஒதுக்குதல் ஏற்கெனவே மக்களின் ஆரோக்கியம், வளங்களுக்கான அணுகல், மற்றும் அரசின் மீது நம்பிக்கை ஆகியவற்றில் எதிர்மறையான தாக்கத்தை ஏற்படுத்தியுள்ளன, மேலும் இது கடுமையான வெப்பத்தினால் மேலும் தீவிரமாகிவிடும்.

தண்ணீர் அமைப்புகள் அல்லது பசுமையான பகுதிகளின் மூலமாக வெப்பநிலைகளைக் குறைக்க முடியும். எனினும், பெரிய பூங்காக்கள் அல்லது குளங்கள் உள்ள பகுதிகளும் வாழ்வதற்கு மிகவும் பிரபலமான பகுதிகளாக இருக்கும் (மேலும் இத்தகைய பகுதிகளை புதிதாக உருவாக்குவது பெரும்பாலும் வசதிமிக்க மக்களுக்காகவே ஒதுக்கப்படுகிறது), அதனால் குறைந்த-வருமானமுள்ள மக்கள் இதில் இடங்களை வாங்க முடிவதில்லை அல்லது அத்தகைய பகுதிகளுக்குள் நுழையக்கூட முடிவதில்லை, அதனால் அவர்கள் வெப்பமான பகுதிக்குச் செல்ல நிர்பந்திக்கப் படுகின்றனர். கூடுதலாக, எல்லா குடிமக்களாலும் பசுமையான பகுதிகளை அணுக முடியாது. உதாரணமாக, பாதுகாப்புக் கவலைகள் அல்லது கலாச்சார காரணிகள் அடர்த்தியான பூங்காக்கள் மற்றும் காட்டுப் பகுதிகளுக்கு பெண்கள் தனியாக செல்வதைத் தடுக்கக் கூடும்.

ஒரு நிலப்பகுதியின் வெப்பம் சார்ந்த சாவல்களுக்கு பங்களிக்கக் கூடிய இதர காரணிகளில், சமூக மக்கள்தொகையில், மாசு ஏற்படுத்தும் வளங்களுக்கு அருகில் இருத்தல் மற்றும் புயல்கள், வெள்ளங்கள், மற்றும் வறட்சிகள் போன்ற கூடுதல் அபாயங்கள் ஆகியவை உள்ளடங்கும்.

வெப்பத்தால் பாதிக்கப்பட்ட சமூக மக்களுடன் கொண்ட ஈடுபாட்டின் காரணமாக உருவான நலிவுநிலை மதிப்பீடுகள் திட்ட அல்லது திட்டமிடுதல் செயல்முறை முழுவதும் உங்களது முடிவு எடுத்தல் செயல்முறைக்கு வழிகாட்டுவதாக இருக்க வேண்டும். பொதுவாக, நலிவுநிலை மதிப்பீட்டின் மூலமாக யார் வெப்பத்திற்கு நலிவடைகிறார்கள், அவர்கள் எங்கே இருக்கிறார்கள், மற்றும் அவர்கள் எப்போது அதிக அபாயத்தில் இருக்கிறார்கள் என்பது தெளிவாக உணர்த்தப்பட வேண்டும்.

உதாரணமாக, வெப்பத்தின் காரணமாக யார் அதிக தாக்கத்தினை எதிர்கொள்கிறார்கள் மேலும் எப்படி என்பதை புரிந்துகொள்வதற்காக வெஸ்டர்ன் சிட்னி, ஆஸ்திரேலியா பல்வேறு வகையான பணிமனைகள் மற்றும் நேர்காணல்களை பங்குதாரர்களுடன் நடத்தியது.இதிலிருந்து நகர்புற வெப்பத் தீவு பாதிப்பு ஒரு தெளிவான பிரச்சனையாக தெரிய வந்தது, அதன் பலனாக, நகரின் செயல் திட்டத்தில் புதிய கட்டிடங்களை திட்டமிடுதல் மற்றும் வடிவமைப்பதன் மூலமாக நகர்புற வெப்பத் தீவு பாதிப்புகளைக் குறைப்பதற்கு முன்னுரிமை அளிக்கப்பட்டது. நலிவுநிலை மதிப்பீடுகளைப் பயன்படுத்துவது மக்களின் ஆரோக்கியம் மற்றும் வாழ்வாதாரங்களைப் பாதுகாப்பதில் முதலீடு செய்ய வேண்டும் என்கின்ற ஒரு தெளிவான மற்றும் குறிப்பிட்ட தேவையைப் புரிய வைக்கலாம்.

நீங்கள் நலிவுநிலை என்பதை எப்படி விவரிக்கிறீர்கள் என்பது உங்களது வெற்றியின் அளவீட்டை முடிவு செய்யும், மேலும் நலிவுறும் மக்களுடன் உள்ள ஈடுபாடு என்பது திட்டமிடுதல் செயல்முறைக்கு பிறகு நின்றுவிடக் கூடாது. சமூக மக்கள்-அடிப்படையிலான அல்லது சமூக மக்கள்-மூலமாக வழிநடத்தப்படும் முயற்சிகள் நீடித்த தன்மை கொண்டதாக மற்றும் வெற்றி பெறுவதற்கான அதிக வாய்ப்புள்ளது, ஏனெனில் சமூக உறுப்பினர்கள் அந்த திட்டத்தில் முதலீடு செய்வார்கள் மேலும் எந்தெந்த விஷயங்கள் சரியாக செயல்படுகின்றன எங்கே அவை மேம்படுத்தப்படலாம் என்பது குறித்து முக்கியத்துவம் வாய்ந்த கருத்துகளை வழங்குகின்றனர்.

ஒரு நலிவுநிலை மதிப்பீட்டை உருவாக்குவதில் உள்ள ஒரு பொதுவான சவால் அரசு அல்லது வெளி ஆராய்ச்சியாளர்கள் மீது சமூக மக்களுக்கு ஏற்படக்கூடிய நம்பிக்கை இன்மையாகும். முறையான மற்றும் முழுமையான சமூக மக்கள் ஈடுபாடு மற்றும் செயல்முறைக்கு நேரம் மற்றும் வளங்கள் அர்ப்பணிக்கப்படுவது அவசியமாகும், ஆனால் இந்த மாதிரியான மதிப்பீட்டில் இதற்கு முன்பு ஒருசில சமூக மக்கள் ஈடுபடுத்தப்பட்டிருக்க மாட்டார்கள் என்பதை ஏற்றுக்கொள்வது முக்கியமாகும், அதனால் நம்பிக்கையின்மை ஏற்படுகிறது. மக்கள் இதேபோன்ற மதிப்பீடுகளில் ஏற்கெனவே ஈடுபடுத்தப் பட்டிருந்தாலும், தங்களது ஈடுபாட்டிற்கு பலன்கள் ஏற்படுவதைப் பார்ப்பதற்கு முன்னால் கூடுதல் நேரத்தை முதலீடு செய்யத் தயங்குவார்கள். சமூக உறுப்பினர்களை அணுகுவதற்கு முன்னால், வரலாற்றுப்பூர்வமான உறவுகளையும், முன்பு மேற்கொள்ளப்பட்ட ஈடுபாட்டு முயற்சிகளையும் பற்றி புரிந்துகொள்வதற்கு சமூக மக்கள் தலைவர்கள் மற்றும் நிறுவனங்களுடன் பணியாற்ற வேண்டும்.

ஒரு நலிவுநிலை வரைபடத்தை உருவாக்கும்போது, உயர் தரமான தரவு கிடைக்கலாம் அல்லது கிடைக்காமல் போகலாம் (எ.கா. மக்கள்தொகையியல் தரவு, வெப்பநிலைத் தரவு) அல்லது அந்த தரவை சேகரிக்க அல்லது தயாரிக்க மற்றும் பயன்படுத்துவதற்கு தேவையான வளங்கள் மற்றும் ஆற்றல் இல்லாமல் போகலாம். அதேபோன்ற இலக்குகள் அல்லது ஆராய்ச்சித் திறன் உள்ள பங்காளர்களை அடையாளம் காண்பது இந்த இடைவெளியை நிரப்புவதற்கு உதவலாம்.